Mascarenhas 21 / 12 / 2025, Suku Mascarenhas realiza ona atividade pinta foun iha sede suku nian hodi simu tinan foun 2026 ho ambienti ne’ebé diak no foun. Atividade ne’e hala’o husi Konselho suku Mascarenhas hamutuk ho juventude sira, no komunidade lokal sira, hanesan parte husi preparasaun atu simu tinan foun ho espiritu renovasaun, unidade no esperansa.
Pinta foun sede suku ne’e hahú iha loron 21 fulan Dezembru tinan 2025 no aktividade refere hahu husi dader to lokraik, ho objetivu atu halo sede suku Mascarenhas haree foun, naroman no representativu ba servisu públiku. Kór pinta ne’ebé uza mak kór azul, ne’ebé konsidera hanesan símbolu limpeza, dame no seguransa.
Xefe Suku Mascarenhas (Sr. Francisco Lopes), iha nia intervensaun, hateten katak pinta foun sede suku la’ós de’it atividade fisiku, maibé mos parte husi esforsu atu hadia imajen administrasaun suku nian. “Ami hakarak simu tinan foun 2026 ho animu foun. Sede suku mak fatin servisu ba povu, tan ne’e presiza iha kondisaun di’ak no konfortavel,” hateten xefe suku.
Juventude sira iha suku Mascarenhas mos partisipa aktivamente iha prosesu pinta foun ne’e. Sira voluntáriu ho fuan boot, pinta sede suku liur no laran. Ida husi representante juventude hateten katak atividade ne’e fo oportunidade ba juventude atu kontribui direta ba dezenvolvimentu suku nian no hamoris sentidu responsabilidade no solidariedade iha komunidade.
Komunidade lokal sira apresia iniciativa ne’e tanba konsidera katak sede suku ne’ebé naroman no organizadu bele fó konfiansa ba povu bainhira mai trata dokumentu ka halo konsultasaun administrativa. Sira mos espera katak iha tinan 2026, lideransa suku bele kontinua hadia servisu no fó atensaun ba presiza moris komunidade nian.
Ho pinta foun sede suku Mascarenhas, komunidade ho lideransa lokal fó sinal klaru katak sira prontu simu tinan foun 2026 ho hanoin positivu, ho hakarak hametin dame, unidade no dezenvolvimentu sustentavel iha nivel suku.
(“Boasfesta do Santo Natal 2025 e Feliz do Ano Novo 2026”)
“Official Media Suku Mascarenhas”
