Mascarenhas 17/01/2026 – Suku Mascarenhas kontinua demonstra kompromisu forte atu mantén kultura limpeza jeral iha komunidade, liu-liu iha loron fim de semana, husi Aldeia 01 to’o Aldeia 06. Aktividade ne’e hala’o ho partisipasaun ativa husi konselho suku, KPK, juventude no inan-aman, ho slogan: “Hametin Limpeza, Hametin Saúde Komunidade.”
Slogan ida-ne’e hatudu katak limpeza mak fator importante ne’ebé iha ligasaun direta ho saúde komunidade. Bainhira komunidade hametin limpeza iha ambiente, hanesan hamos lixu, hadia drenajen no hadia fatin moris, risku moras bele tun, liu-liu moras ne’ebé mai husi foer no ambiente ne’ebe la mos.
Slogan ida-ne’e mos fó mensajen katak saúde komunidade la depende de’it ba servisu médiku, maibé hahu husi atitude simples loron-loron, hanesan halo limpeza fatin uma, dalan no fatin públiku. Ho limpeza ne’ebé diak, komunidade bele sai saudavel, moris diak no iha futuru ne’ebé diak liu.
Limpeza jeral ne’e halo iha kada aldeia ho objetivu prinsipál husi atividade ida ne’e mak atu prevene doensa/moras, hasa’e kualidade moris komunidade, no hamoris hamutuk espiritu kooperasaun entre komunidade sira.
Xefe Suku Mascarenhas (Sr. Francisco lopes) haktuir katak limpeza ambiente la’ós de’it obrigasaun governu, maibé responsabilidade kolektiva komunidade tomak. “Se ita hakmatek hamutuk, ita bele kria ambiente ne’ebé moos, seguru no saudável ba labarik sira, ema ferik sira no jerasaun oin,” hateten Xefe Suku Mascarenhas.
Komunidade husi aldeia ida-idak mos hatudu entuziasmu no konsiensia aas kona-ba importância limpeza. Tanba ne’e, atividade limpeza jeral la’ós de’it serimónia simbolika (iha aktividade inisiu tinan foun 2026), maibé sai ona parte husi kultura moris lor-loron iha Suku Mascarenhas.
Ho kontinuidade atividade hanesan ne’e, Suku Mascarenhas espera bele sai modelu ba suku sira seluk iha munisípiu Dili, hodi hametin kultura limpeza no saúde komunidade ba dezenvolvimentu sustentável iha futuru.
Offisial Media Suku Mascarenhas
