Mascarenhas 23/12/2025 – Sarani Suku Mascarenhas, hamutuk ho Parókia Imaculada Conceição de Balide, realiza ona atividade peregrinasaun lao-ain husi Igreja Parókia Imaculada Balide ba Igreja Katedral, hanesan parte husi atividade relijiozu atu hametin fe, espiritualidade no unidade sarani katólika sira iha komunidade.
Atividade ne’e hala’o ho partisipasaun boot husi sarani sira (sarani suku 5 hanesan suku mascarenhas, Santa Cruz, Bemori, lahane oriental no suku Lahane Osidental nebe integra iha Paroquia Balide), lider relijiozu, juventude, inan-aman no ema katuas sira, ne’ebé ho laran kontente no devozaun tomak (seluruh pengabdian).
Peregrinasaun hahú iha Oras tuku 03.00 lokraik iha Igreja Balide ho orasaun hamutuk, aktividade ne lidera husi amu Vigario Paroquia Balide.
Durante dalan lao-ain, Sarani sira reza rosáriu (Reza terus) no kanta knanuk relijiozu, hodi lembra sakrifísiu Ita Nia nai Jesus Kristu no dalan fe ne’ebé presiza hala’o iha moris loroloron.
Atmosfera peregrinasaun nian senti hanesan momentu ida ne’ebé kmanek no kle’an, ne’ebé bele hametin relasaun entre ema ho Maromak no mos entre ema ho ema.
Atividade peregrinasaun ida ne’e mos hetan apoiu seguransa husi PNTL Esquadra Vera Cruz no Konsellu Polisiamentu Komunitáriu (KPK), ne’ebé halo koordinasaun ho Paqroquia Balide hodi garante seguransa no laiha engarrafamentu trafiku durante prosesu lao-ain. Presensa PNTL Esquadra Vera Cruz no KPK iha dalan hotu-hotu ne’ebé liu hosi peregrinasaun nian fó sentimentu seguransa ba sarani sira, no prevene risku ne’ebé bele akontese durante atividade ne’e.
Xefe Suku Mascarenhas (Sr. Francisco Lopes) hato’o katak peregrinasaun lao-ain ne’e la’ós de’it atividade relijiozu, maibé mos sai hanesan momentu edukasaun ba juventude no komunidade atu valoriza disciplina, solidariedade no servisu hamutuk. Parókia Imaculada Conceição de Balide mos apresia partisipasaun aktivu husi sarani sira no apoiu husi KPK, ne’ebé hatudu katak kolaborasaun entre igreja, komunidade no estrutura seguransa lokal bele halo atividade públiku la’o ho di’ak.
Iha remata peregrinasaun, sarani sira to’o iha Igreja Katedral ho sentidu laran ida no kontente. Iha ne’ebá, hala’o misa hamutuk no simu bénsaun hanesan sinal agradese ba Maromak tanba proteksaun, dame no oportunidade atu hala’o peregrinasaun ho seguransa no orden. Sarani Suku Mascarenhas no Parókia Imaculada Conceição de Balide hein katak atividade hanesan ida ne’e bele kontinua iha futuru, atu sai tradisaun espirituál ne’ebé hametin fe no unidade komunidade.
Official Media Suku Mascarenhas
