Mascarenhas 26/12/2025 – Ofisiál Polísia Suku Mascarenhas hamutuk ho Konsellu Polisiamentu Komunitáriu (KPK), konsege rezolve ona problema komunidade ne’ebé akontese iha Aldeia Alto PM relasiona ho disputa entre dun malu buan ne’ebé akontese loron hirak Liu ona ba.
Problema ne’e mosu husi dun malu buan entre parte rua kona-ba kestaun sosial no relasaun familiár (Vijinhu), ne’ebé halo situasaun sai sensível no ameasa hamutuk nia moris di’ak iha aldeia refere. Ho haree situasaun ne’e, Ofisiál Polísia Suku (Sr. Joel Pereira) no KPK foti inisiativa lalais hodi halo mediassaun no dialogu ho parte sira hotu.
Iha prosesu rezolusaun, Ofisiál Polísia Suku ho KPK hahu ho abordajen diálugu, fó oportunidade ba parte sira atu hatete sira nia sentimentu no klarifika problema ne’ebé mosu. Mediador sira hatudu atitude neutru, respeitu no bazeia ba valor kultura lokal, liuliu prinsipiu dame, respeitu malu no moris hamutuk iha komunidade.
Depois husi diskusaun ne’ebé konstrutivu, parte rua kona-ba problema dun malu buan konkorda atu halo dame malu no compromete an sei la repete tan konflitu hanesan iha futuru. Sira mos asina akordu simples ida ne’ebé testemuña husi Ofisiál Polísia Suku, KPK no lia-na’in aldeia.
Ofisiál Polísia Suku hatur agradesimentu ba KPK no komunidade Aldeia Alto PM ne’ebé kooperativu iha prosesu rezolusaun problema, no husu ba ema hotu atu uza dialogu hanesan dalan ida hodi rezolve konflitu. Nia mos hateten katak polisia suku no KPK sei kontinua servisu hamutuk hodi garante seguransa, dame no estabilidade iha komunidade durante selebrasaun loron natal no tinan foun 2026.
Komunidade Aldeia Alto PM, suku Mascarenhas apresia esforsu ne’ebé hala’o husi Ofisiál Polísia Suku no KPK, tanba rezolusaun ne’e la’ós de’it rezolve problema ida, maibé mos hametin unidade, solidariedade no harmonia iha moris hamutuk iha aldeia.
Official Media Suku Mascarenhas
