Mascarenhas, 24/12/2025 – Konsellu Polisiamentu Komunitáriu (KPK) Suku Mascarenhas servisu hamutuk ho Polísia Nasionál Timor-Leste (PNTL) hodi fo seguransa no mantén orden públiku iha kalan selebrasaun Misa Natal iha Igreja Imakulada Konseisaun Balide. Servisu seguransa ida ne’e halo atu garante katak selebrasaun Natal la’o ho di’ak, seguru no hakmatek ba povu sarani hotu-hotu ne’ebé mai partisipa iha misa sagrada ne’e.
Iha kalan Misa Natal, membru KPK Suku Mascarenhas no PNTL distribui aan iha fatin estratéjiku sira iha área igreja, dalan tama-sai, no área parkeamentu. Sira halo kontrolu trafiku, ajuda organiza movimentu ema sira, no asegura katak la iha disturba ka situasaun ne’ebé bele halo ema sente la seguru. Kooperasaun di’ak entre KPK no PNTL hatudu kompromisu ida atu servisu ba komunidade no fó prioridade ba seguransa públika, liuliu iha momentu relijiozu ne’ebé importante tebes ba sarani katolika.
Xefe KPK Suku Mascarenhas atual Xefe Suku (Sr. Francisco Lopes) hateten katak envolvimentu KPK iha servisu seguransa ne’e hanesan forma ida atu hamoris responsabilidade komunitária no aumenta parcerias entre lideransa suku, juventude, no instutuisaun seguransa estadu. “Ami hakarak garante katak ema hotu bele selebra Natal ho hakmatek no la iha preokupasaun kona-ba seguransa,” dehan Xefe KPK ne’e
Enkuantu ne’ebá, reprezenta husi PNTL apresia kontribuisaun KPK ne’ebé servisu voluntáriu ho disiplina no koordinasaun di’ak. Nia subliña katak kolaborasaun entre polísia no komunidade importante atu prevene kriminalidade no fó konfiansa ba povu.
Ho iha seguransa ne’ebé di’ak, selebrasaun Misa Natal iha Igreja Balide la’o ho susesu no ema sarani sira bele halo orasaun no agradesementu ba Maromak ho hakmatek. Atividade ida ne’e sai hanesan ezemplu di’ak ba servisu hamutuk entre komunidade, Igreja no PNTL atu hari’i ambiente seguru no ordenadu iha Suku Mascarenhas.
Official Media Suku Mascarenhas
