Mascarenhas 31/12/2025 – Konsellu Polisiamentu Komunitáriu (KPK) Suku Mascarenhas servisu hamutuk ho Polícia Nasionál Timor-Leste (PNTL) hodi fo seguransa no orden públiku iha kalan Misa selebrasaun Tinan Foun 2026, ne’ebé realiza iha Igreja Balide, Díli.
Servisu kooperasaun ne’e halo atu garante ema hotu-hotu bele tuir no partisipa iha misa ho seguru, dame no tranquilidade. Antes misa hahú, ekipa KPK ho PNTL halo koordinasaun iha área Igreja Balide, inklui organiza tráfiku, kontrolu entrada no saida ema, vixilánsia preventiva atu prevene disturbansa ka incidentes ne’ebé bele afeta seguransa públiku, fo informasaun ba sarani Sira antis Tama ba area igreja labele lori no sunu petasan iha area igreja wainhira misa Lao hela.
KPK mos halo papel importante iha sensibilizasaun ba komunidade, hodi husu kolaborasaun ema hotu atu respeita regra no orden iha fatin relijiozu.
Durante misa, PNTL no KPK hamutuk hala’o ronda no monitorizasaun contínua iha laran no liur igreja. Aksaun ida ne’e fó konfiansa ba komunidade sira, tanba iha presensa forsa seguransa ne’ebé prontu responde ba situasaun ruma se presiza. Servisu hamutuk ne’e reflete kompromisu forte husi instituisaun seguransa no komunidade lokal hodi hadia koesaun sosial no dame iha suku.
Xefe KPK Suku Mascarenhas hateten katak kooperasaun ho PNTL iha eventu relijiozu hanesan misa Tinan Foun mak importante liu-liu atu mantén harmonia no seguransa. “Ita nia objetivu mak servisu ba komunidade, garante ema hotu bele selebra Tinan Foun ho haksolok no seguransa,” dehan Xefe KPK
Ho apoiu husi PNTL, KPK Suku Mascarenhas kontínua hatudu kompromisu iha servisu polisiamentu komunitáriu, hodi fó kontribuisaun positivu ba estabilidade, orden públiku no dame iha Suku Mascarenhas no área Balide tomak.
Offisial Media Suku Mascarenhas
