Mascarenhas, Sesta Feira, 23/01/2026 – Konselhu Suku Mascarenhas konsege rezolve problema desentendimentu entre família rua ne’ebé hela iha Aldeia Baixo PM, liuhusi mekanismu kultura lokal Tara Bandu, ho prosesu nahe biti no lulun biti ne’ebé hala’o iha Aitos Sede Suku Mascarenhas.
Prosesu rezolusaun ne’e envolve diretamente Xefe suku, OPS, lia nain, Xefe Aldeia, delegado/a no família sira ne’ebé mak hola parte iha konflitu. Abordajen kultura ne’e hodi fó espasu ba diálugu aberto, atu família rua bele hato’o sira-nia hanoin no sentimentu ho laran hakmatek, no buka solusaun dame ne’ebé bele simu hamutuk.
Desentendimentu ne’e mosu husi diferensa relasaun sosial no problema rua ne’ebé seidauk rezolve durante tempu balu. Ho inisiativa Konselhu Suku, prosesu Tara Bandu sai hanesan dalan dame atu hakotu konflitu no prevene problema ne’e sai boot liu iha komunidade.
Iha momentu nahe biti no lulun biti, lia nain hato’o liafuan kultura kona-ba valor respeitu malu, dame, no moris hamutuk iha komunidade. Família sira ne’ebé envolvidu hato’o kompromisu atu respeita rezolusaun ne’ebé hetan hamutuk no la repete problema hanesan iha futuru ho komitmentu nebe maka hakerek ona iha deklarasaun akordu no Ref : 37 / SMC / PAVC / MD / I /2026.
Chefe Suku Mascarenhas (Sr. Francisco Lopes), iha okaziaun ne’e, hato’o apresiasaun ba hotu-hotu ne’ebé mak fó kontribuisaun iha prosesu rezolusaun ne’e, no apela ba komunidade atu kontinua uza diálugu no kultura lokal hanesan dalan prinsipál atu rezolve problema sosial.
Rezolusaun konflitu liuhusi Tara Bandu ne’e hatudu katak sistema kultura lokal sei iha papel importante iha hametin koesaun sosial, hadia relasaun komunidade no garante dame no estabilidade iha Suku Mascarenhas.
Official Media Suku Mascarenhas.
