Mascarenhas 10/01/2026 – Suku Mascarenhas halo atividade limpeza geral hodi hahú tinan foun 2026 ho espírito solidariedade no responsabilidade kolektiva. Atividade ida ne’e realiza iha loron sira hahú tinan foun, no envolve diretamente komunidade husi Aldeia 01 to’o Aldeia 06, ho partisipasaun ativa husi xefe aldeia, xefe suku, jovem sira, inan-aman, no membru komunidade seluk.
Limpeza geral ida ne’e foka ba iha aldeia-aldeia sira hanesan: hamos foer iha valeta laran & ninin, Estrada dalan tama ba kada aldeia, uma ninin area komunidade, no fatin sira ne’ebé konsidera importante ba saúde no seguransa ambientál. Komunidade sira hamutuk hodi hamos lixu, hamos ai-funan no fo dalan ba mobilidade di’ak liu iha suku. Atividade ne’e mos servisu hodi hamosu konsiensia kona-ba importância husi limpeza ambientál ba moris saudável.
Xefe Suku Mascarenhas (Sr. Francisco Lopes) iha nia intervensaun badak hateten katak saude iha Ita Nia liman rasik Tan ne’e limpeza geral ne’e la’ós de’it atividade fisiku, maibé simbolu hahu tinan foun 2026 ho hanoin foun, atitude foun no kompromisu foun hodi hari’i suku ne’ebé moos, segura no harmoniu. “Hahu tinan foun ho limpeza mak signál katak ita hotu hakarak muda hodi fo di’ak liu ba komunidade no futuru labarik sira,” hateten Xefe Suku.
Komunidade husi aldeia ida-idak mos hatudu entuziasmu no kooperasaun di’ak. Jovem sira assume papel importante iha organiza malu no implementasaun atividade, ne’ebé mos sai momentu ida hodi haburas hamutuk no koesaun sosial iha suku.
Ho realiza limpeza geral ne’e, Suku Mascarenhas espera katak komunidade bele kontinua mantém kultura limpeza no disciplina ambientál durante tinan 2026 tomak. Atividade ne’e mos espera bele sai ezemplu ba suku sira seluk hodi hahú tinan foun ho aksaun pozitivu ne’ebé fó benefísiu direto ba povu no ambiente.
Offisial Media Suku Mascarenhas
