Mascarenhas 22 / 12 / 2025, Hodi garante seguransa, ordem públiku (ketertiban umum) no estabilidade durante selebrasaun Misa Loron Natal no hasoru Tinan Foun 2026, Konsellu Suku Mascarenhas hamutuk ho Konsellu Polísiamentu Komunitária (KPK) hala’o ona enkontru koordinasaun ida iha sede suku Mascarenhas. Enkontru ida nee ho objetivu atu prepara medida seguransa no planeamentu preventivu, hodi evita insidente ne’ebé bele perturba (mengganggu) selebrasaun relijioza no sosial.
Enkontru nee partisipa husi Xefe Suku Mascarenhas Interino, OPS (Offisial Polisia Suku), membru Konsellu Suku, membru KPK, lideransa lokal, joventude no membru komunidade. Iha diskusaun, parte sira identifika risku ne’ebé bele mosu durante misa Natal no selebrasaun Tinan Foun, espesialmente iha juntamentu ema barak, movimentu tráfiku, no uza bebida alkoolika ne’ebé la kontrola.
Xefe Suku Mascarenhas (Sr. Francisco Lopes) maske la marka prezensa maibe envia hela Mensagem ba iha enkontru refere hateten katak Natal no Tinan Foun mak momentu importante ba komunidade atu hamutuk no selebra, tan ne’e seguransa mak responsabilidade hamutuk. Nia sublinha katak koordinasaun entre suku ho KPK importante loos atu halo prevensaun hodi garante ema hotu bele selebra ho laran dame no haksolok.
Husi OPS (Ofisial Polisia Suku) hamutuk ho KPK informa katak sira sei aumenta patrulha iha fatin stratejiku, hanesan igreja, dalan boot, no fatin ajuntamentu ema. KPK mos sei kooperasaun ho konsellu suku hodi monitoriza situasaun seguransa durante períodu Natal to’o Tinan Foun.
Alende enkontru koordinasaun nee, iha momentu ida ne’e mos, konsellu Suku Mascarenhas hala’o distribuisaun uniforme ba membru KPK. Distribuisaun uniforme nee hetan apoiu husi Komandante Polisia Komunitaria Munisipiu Dili ho total 25 uniforme, apoiu hirak ne’e nu’udar forma apoiu ba apresiasaun servisu voluntáriu ne’ebé KPK halo iha komunidade, liuhusi esforsu hodi hadia disiplina, identidade no profesionalismo KPK nia servisu iha área suku.
Xefe Suku hateten tan katak fornesimentu uniforme ba KPK sei ajuda sira halo knaar ho liu organizadu no aumenta konfiansa komunidade ba sistema seguransa lokal. Nia mos hamoris mensajen ba KPK atu kontinua servisu ho laran metin, onestu no respeita lei.
Ho realizasaun enkontru nee no distribuisaun uniforme ba KPK, Konsellu Suku Mascarenhas espera katak selebrasaun Misa Loron Natal no Tinan Foun sei la’o ho situasaun seguru, ordenadu no dame, hodi fortalece estabilidade, solidariedade no pas iha komunidade suku Mascarenhas.
Ofisisal Media suku Mascarenhas
